L-ewwel persuni minn dan il-grupp se jirtiraw fl-2027 fl-età ta’ 65 sena. Dan il-grupp ta’ persuni huwa magħruf bħala l-iSwitchers Group. Jekk inti twelidt f’din il-kategorija ta’ età, il-pensjoni tas-sigurtà soċjali tiegħek se tkun ibbażata fuq ir-regoli li jidhru fit-tabella hawn taħt.
Età tal-pensjoni, akkumulazzjoni u perjodu ta’ kalkolu
| Imwieled/a bejn l-1962 u l-1968 | |
| L-età tal-irtirar tiegħek | 65 sena |
| Kontribuzzjonijiet tas-SS li jridu jiġu akkumulati | Massimu ta’ 50 kontribuzzjoni annwali għal perjodu ta’ 40 sena |
| Kalkolu tal-pensjoni tas-sigurtà soċjali tiegħek | persuna impjegata / taħdem għal rasha / self- occupied: l-aħjar 10 snin kalendarji minn 40 sħaħ |
| Kalkolu tad-dħul tal-pensjoni tas-sigurtà soċjali | 2/3 tas-salarju bażiku sa dħul massimu mill-pensjoni. Id-dħul massimu tal-pensjoni għal din il-faxxa ta’ età huwa spjegat fid-dettall hawn taħt, billi dan se jinbidel kull sena abbażi ta’ formula definita minn qabel. |
Huwa importanti għalik li tkun taf li jekk takkumula massimu ta’ 52 kontribuzzjoni ta’ kull ġimgħa għal perjodu ta’ 40 sena (mill-età 18 sad-data tal-irtirar), tista’, jekk tixtieq tagħmel dan, tirtira meta tilħaq l-età ta’ 61 sena. Jekk tixtieq tirtira f’età ta’ 61 sena, ma titħalliex tkompli l-impjieg sakemm tilħaq l-età statutorja tal-irtirar ta’ 65 sena. Dan huwa “il-prezz soċjali” li int mitlub/a li tbati għad-deċiżjoni li għamilt biex tagħżel “id-divertiment” milli tkompli tikkontribwixxi b’mod effettiv għall-età tal-irtirar tiegħek.
Żieda fid-dħul massimu tal-pensjoni
Id-dħul massimu mill-pensjoni jiżdied kull sena bil-formula li ġejja:
Dħul massimu tal-pensjoni = dħul massimu tal-pensjoni + [(70% taż-żieda fl-inflazzjoni tal-pagi) + (30% taż-żieda fl-inflazzjoni)].
Din il-formula ġiet introdotta biex (i) iżżomm relazzjoni bejn id-dħul annwali tiegħek mill-pensjoni tal-istat u l-paga medja; u (ii) tipprovdilek grad ta’ protezzjoni kontra t-telf tas-saħħa tal-akkwist tad-dħul tal-pensjoni tiegħek riżultat tal-inflazzjoni. Fuq il-bażi ta’ din il-formula, id-dħul massimu mill-pensjoni qed jiżdied kif jidher fit-tabella ta’ hawn taħt.
| Sena | Id-dħul massimu mill-pensjoni |
| 2014 | Euro 21,431 |
| 2015 | Euro 21,749 |
| 2016 | Euro 22,137 |
| 2017 | Euro 22,803 |
| 2018 | Euro 23,701 |
| 2019 | Euro 24,194 |
| 2020 | Euro 24,986 |
Ilkoll smajna bil-pensjoni massima ta’ kull ġimgħa.
Kemm tirċievi pensjoni jiddependi fuq in-numru ta’ kontribuzzjonijiet li qed tħallas u s-salarju li qed taqla’.
Madankollu, jekk qed tirċievi salarju akbar minn jew daqs id-dħul massimu tal-pensjoni, u għandek il-ħsieb li taħdem u tħallas kontribuzzjonijiet għal 40 sena, id-dħul tal-pensjoni tiegħek se jiġi kkalkulat skont il-limitu massimu tad-dħul pensjonabbli.
Żieda marbuta mal-posponiment tal-pensjoni lil hinn mill-età ta’ 61
Il-gvern iridek tibqa’ attiv fis-suq tax-xogħol. Dan huwa importanti kemm għalik personalment kif ukoll għall-ekonomija b’mod ġenerali. Ir-riċerka turi li meta tibqa’ attiv fl-impjieg tgħinek ekonomikament, peress li qed taqla’ dħul li probabbilment huwa ogħla mid-dħul tal-pensjoni li tirċievi jekk tirtira, u soċjalment x-xogħol jipprovdilek opportunitajiet akbar li tinteraġixxi.
Minn perspettiva ekonomika nazzjonali, il-kontinwazzjoni tiegħek fl-impjieg tirriżulta f’aktar produttività nazzjonali, aktar kontribut miżjud minħabba l-esperjenza u l-memorja istituzzjonali li żżomm.
Biex jinkoraġġik ma tirtirax kmieni, qabel l-età tal-irtirar tiegħek, il-gvern introduċa skema li tippermettilek tirċievi pensjoni ogħla għal kull sena li inti tibqa’ f’impjieg sal-età ta’ 65 sena. Iż-żieda fil-pensjoni tiegħek hija bbażata fuq il-kundizzjoni li matul dik is-sena li inti tibqa’ f’impjieg ma tirċevix il-pensjoni tiegħek u tkun koprejt il-limitu meħtieġ ta’ kontribuzzjonijiet biex tkun tista’ tirtira qabel l-età pensjonabbli tiegħek.
Din l-iskema hija mmirata biex tinċentivak tibqa’ taħdem sal-età ta’ 65 sena u bħalissa hija miftuħa biss għall-persuni impjegati fis-settur privat.
It-tabella ta’ hawn taħt turi l-impatt li din l-iskema se jkollha fuq id-dħul tal-pensjoni tiegħek jekk inti tieħu sehem fiha.
| Età tal-irtirar | Żieda | Dħul mill-pensjoni |
| Snin | % | € |
| 61 | 0 | 8,000 |
| 62 | 5 | 8,400 |
| 63 | 10.5 | 8,840 |
| 64 | 16.5 | 9,320 |
| 65 | 23 | 9,840 |
Kif din it-tabella turi, jekk pereżempju, int intitolat għal dħul mill-pensjoni ta’ €8,000 fis-sena ta’ 61 sena, jekk tirrifjuta din il-pensjoni, u tkompli taħdem u mbagħad titlob il-pensjoni aktar tard fl-età ta’ 65 sena, ikun ifisser li tibbenefika minn din l-iskema ta’ inċentivi u żżid id-dħul tal-pensjoni tiegħek għal €9,840 fl-età ta’ 65.
Fil-każ ta’ mewt ta’ pensjonant/a, il-persentaġġ taż-żieda jintiret?
Il-konjuġi tiegħek se jibbenefika wkoll minn din iż-żieda fil-każ li inti tmut u tkun ibbenefikajt minn din iż-żieda inti stess.
Id-dritt għal krediti lil kwalunkwe persuna assigurata jiġi lil persuna:
- intitolata għall-benefiċċju tal-mard, jew benefiċċju tal-korriment, jew benefiċċju tal-qgħad, jew benefiċċju speċjali tal-qgħad, jew pensjoni tal-invalidità;
- li tfittex impjieg permezz tal-ETC jiġifieri tirreġistra taħt l-ewwel parti tar-reġistru miżmum skont id-dispożizzjonijiet tal-att dwar is-servizzi ta’ impjieg u taħriġ. Hi tirċievi l-benefiċċji tal-qgħad u għalhekk tikseb krediti ta’ benefiċċju;
- wara t-twettiq tax-xogħol tal-volontarjat f’Malta jew barra mill-pajjiż;
- li tieqaf mill-karriera biex tieħu ħsieb lit-tifel/tifla tagħha;
- intitolata għall-pensjoni tal-carers;
- li tirtira jew irtirat mis-servizz b’pensjoni sħiħa mill-gvern (eżempji ta’ eks membru tal-Korp tal-Pulizija ta’ Malta jew tal-Forzi Armati ta’ Malta) mat-tlestija tas-servizz qabel ma laħqet l-età tal-pensjoni;
- li kompliet bl-edukazzjoni f’livelli ogħla.